我的黃金歲月-在裕民坊

從7歲起搬到官塘月華街居住，直至20歲才搬走。
人生最黃金的歲月，就在官塘的大街小巷悄悄地溜走了。
時光消逝，但曾經經歷過的，卻深深印在腦海裡。

.

.

知道裕民坊那遍地方，與及隱藏在內要有心地慢慢地領會才滲透出來舊區獨有的豐富人情味，都要被香港政府用一個美麗的藉口，將他一併連根拔起。
頓時無數的回憶，美好的、夾雜著傷感的，湧上心頭…
試問人的情感豈會只像電腦般撳一個delete制或索性重新format過部電腦那麼簡單就可以刪除掉嗎?
小時候, 可能係大女又文靜(事實係唔多講野而弟弟們還小)既關係, 爸爸總喜歡帶住我周圍去,食過晚飯, 爸爸好多時都會帶我到裕民坊巴士總站, 那時嗰處仲係 一塊空地, 有人打功夫, 賣鐵打藥, 爸爸會買個雪梨畀我食, 我唔係鍾意食雪梨, 而係好恨睇佢超快摩打手批雪梨皮既表演

在裕民坊巴士總站, 舊樓樓梯腳有位亞伯收錢幫人寫信, 我小時候陪媽媽去幫櫬佢, 難道媽媽要講啲秘密野唔比老豆知(?), 佢寫完封信都會代寄埋架

裕民坊巴士總站舊樓有擋褶骨鋪, 十零歲女 , 冇錢又要扮靚, 就要自己動手做衫, 响報紙擋有一包包既紙樣賣, 封面有個靚女著住嗰款衫裙既照片, 內裡紙樣畫左大中細碼, 照住佢嚟裁剪, 剪好啲布料, 要去幫櫬褶骨, 車好件衫裙, 又要去果道配button

有次瞓到朦朦鬆鬆, 被爸爸拍醒問我去唔去銀都戲院睇戲, 佢响銀行做, 成日都有贈券, 同愛國電影啲贈券, 愛國電影會响銀都戲院放映, 有時禮拜日佢又會帶我地一家大細去銀都睇早場, 睇鮑起靜,王葆真啲電影, 爸爸話嗰時鮑起靜好靚, 我覺得依家都係, 仲好親切添, 可能係有加咗啲美好童年回憶既因素在內掛

銀都戲院隔離有間書局, 地面賣文具, 有幾層樓高, 好似叫(官塘書局?), 約人去銀都睇戲, 就約响書局等, 一路睇住書嚟等, 唔覺唔覺都睇左好多書喇, 多謝老闆呀, 後來佢冇做, 轉左手變成(新華書局?) 銀都戲院正面過條紅綠燈有一大片空地, 好多小販, 買平價衫褲, 小飾物等

裕民坊同時有過兩間國貨公司, 中匯同珠江, 中匯啲價錢平啲, 爸爸會帶我地去中匯多, 欣賞下工藝品, 齋睇玩具, 响呢道就可以消磨一個晚上, 最後佢都會買一包包成橙形既軟糖畀我地三姊弟, 因可以一塊塊分嚟食, 大大(大元?)百貨係後來先至有咋, 有家庭用品, 有衣服呀牛仔褲賣, 執笠清貨果時太多人嘞, 太迫入唔到去執平貨添

準姑丈(嗰時佢係呢個身份)有次請我地三姊弟去華都餐廳食西餐, 嗰道黑嗎嗎, 懒有情調咁, 食正式既西餐, 仲係一人食晒一份, 唔洗幾個人分, 真係生平第一次, 爸爸曾經帶過我地去協和街皇上皇食扖餐 只有一碟野有啲扒咁, 幾笑料吓

我地三姊弟雖然年紀細細就識得就住大人個荷包, 我已識睇價錢, 點個7文幾既扒餐, 細弟太細, 照跟我, 輪到大弟, 佢瞪大對眼, 左手义腰, 右手指住我地兩個:”你地好唔啱, 叫啲75文咁貴既, 我要 12文呢個”跟住佢手指指住果個係全餐嚟架, 姑姊準姑丈咁不住被佢天真可愛既舉動笑了出來, 馬上話:”好,好,我地就點呢幾個”嘩, 好其待呀,先嚟麵包, 小碟裝住一啲卷起似小圓筒有坑紋既牛油, 面上仲洒左啲糖粒,細個時都諗左好耐係點整, (依家知嘞,牛油咁硬, 係要用有一排鋸齒既刀响牛油面道刮出一塊塊畀你, 未成小圓筒狀囉), 跟住嚟主菜, 然後甜品, 嘩, 用一個小小既高腳杯裝住, 用一個小匙更筆嚟食, 當然, 大弟果個全餐就多好多碟野, 主菜之前仲有頭盆, 主菜之後又有野飲咁啦, 佢一路食都唔察覺佢多過我地好多碟, 一踏進屋企門口就即刻同爸媽告狀, 話我同二弟食啲75文咁貴既餐, 被爸媽點醒, 原來佢先係食最貴既餐, 以後我同二弟成日以此為笑柄嚟取笑佢

及後大啲就最鍾意上華都餐廳閣樓, 可以待上整個晚上, 幾個女仔傾吓少女心事, 同啲男朋友約會吓咁啦

華都餐廳隔離枝記鞋店,我同佢地個女係小學同班同學嚟架, 媽咪同我都係著4號鞋, 除左去中環萬宜大廈果間山打可以買得到鞋之外, 就要响枝記訂鞋架嘞

(隱約記得好似有個廣告: 皮鞋最靚係山打,山打最靚係皮鞋)

真係…真係太多喇…記得起咁多就寫住咁多先啦相片攝於 2011/2/27   5:55pm-6:20pm : -
官塘裕民坊