有人話父母兄弟係上天賜畀你嘅, 冇得你揀, 係好係唔好你都得接受, 但係伴侶,愛人,朋友,甚至老闆,伙記, 你有得揀, 若果他日佢地傷到你的話, 你只可以怪自己當日眼光唔夠, 揀錯左, 怨就怨自已啦, 人亦係最怕有得揀, 驚揀錯吖嘛, 所以某情度上, 冇得揀係幸福嘅, 我今次揀啱左, 我真係幾有眼光, 兜個圈嚟讚吓自己, 可惜自己最貼身最影響深遠既就揀得好錯
上回講過, 我揀左WWM留低幫我, 佢個位就响我既左手邊, boy嚟講平日送吓野去總行, 返番公司就係自己時間, 佢會好安靜坐起度睇小說, 係簡體版金庸呀嗰啲, 佢話簡體版平好多, 遇到唔識既簡體字,會查番佢嗰本繁簡對照天書, 有次佢睇紅樓夢, 仲話睇左唔知第幾次, 我好奇揭左一頁嚟睇吓, 簡直想死, 當佢仲係boy呢個身份既時候, 我有兩三次較忙叫左佢幫手, 佢坐我個位, sort 吓嘢, 禁吓計數機咁, 仲記得第一次我話佢聽點樣做, 佢回答 “哦, 咁啫, 係咪呀? ”, 佢畀我既感覺係好正面, 其實當時佢大可以拒絕我, 呢啲畢竟係 clerical work(文員既工作), 佢平時雖然唔會好主動咁問你洗唔洗幫忙, 但係你一叫到佢, 佢係好樂意, 好聽話嗰種,
升左做文員之後, 當然唔可以得閒就拎本小說出嚟睇吓啦, 佢一做完佢嗰份又會主動問我仲有乜嘢做, 你話喇, 我係咪幾鬼幸福吖, 有個咁既下屬, 係我自己揀架! 而佢亦唔介意會計工作好死板, 只要畀佢準時放工就得架嘞, 日唞份工對佢嚟講只係賺份糧, 玩中樂先係佢既人生目標*, 藝術家就係有呢種與世無爭既傲氣
開心愉快既日子總係唔長久, 其實都三幾年架嘞, 可能快活不知時日過卦, BILLS DEPT (押匯部)眼見呢個男仔咁聽話, 咁做得嘢, 將佢撬左過去, 畢竟BILLS有前途好多, 香港一定會有出入口生意既, 又一定要經銀行做單, 有關既人才真係唔憂出路, 因為佢唔開OT既關係, 佢老闆唔多妥佢, 唔識寶, 冇偈, 其實我離遠睇見佢都好努力咁做到冇停手, 朝9晚5, 盡晒力架嘞, 佢做得有番咁上吓日子, 恃住有關經驗, 就轉左去一間樓上唔做門面生意既銀行, 都係响BILLS DEPT,
我咁諗, 若果佢一路都係响會計部度做, 畀到佢準時放工, 直到銀行清盤嗰日, 佢一定會仲係坐响呢度, 而BILLS 撬佢過去嗰個人, 响佢既人生路途上, 當時好似害左佢咁, 實質係咪幫左佢呢, 一個人要行既路似乎一早已經定好左
*佢依家既人生目標應該改左喇......................係佢個女
沒有留言:
張貼留言