我用十秒決定左兩個少男既前路

呢件事埋藏响我心底廿年多喇,冇同兩位當事人提起過,亦唔可以同同事講出嚟
當 時 我 响 香港總分行,開張嗰時已 轉左做會計呢個職位,有一日,老闆同我講,兩個boy都會升做文員,叫我响佢地當中揀 一個,佢會留低幫我,而另一個就會被調走,我只係諗左10秒就回覆咗佢,老闆用幾驚訝既眼神望一望我,佢心裡面一定係奇怪點解完全唔洗點考慮就唔揀 靚仔好多嗰個,好快亞靚仔就調左去電車路嗰間分行喇,當時我諗,我一個決擇就定左人地既前程,咁畀我揀 左留低嗰個,前途會係好啲嗎,調走左,又未必冇發圍噃
講番佢倆個個位幾近我,係响我左手邊,我地坐閣樓,比較自由,亞靚仔會帶住耳筒,跟住耳筒裡面個歌星一齊唱,佢有次由頭到尾大大聲唱晒成首歌,我地閣樓啲人拍晒手,佢仲未知咩事,因為佢帶住左個耳筒,佢只係見我地拍手既動作先醒覺,先有啲唔好意思咁,同時因為佢真係好靚仔,個樣有啲似黃曉明,笑起嚟又有陽光氣息,所以有好多女仔嗒佢糖,今日見佢  晒頭,冇晒心機,個魂魄似乎唔响佢個軀體度,梗係失左戀,我地太了解佢,連安慰佢都唔需要,聽日佢又會開始新一段戀情,我地笑佢不能一日缺少戀愛,其實佢去左嗰間分行做咩職位我唔太清楚,淨係知佢不停談戀愛,失戀,跟住又談戀愛,跟住又失戀,又談戀愛,若干年後我有去飲佢既結婚酒,當時銀行已經清左盤,佢冇搵番銀行工打,佢老婆係佢以前分行啲客戶既女職員,可能要幫公司去銀行辦事咁認識左卦,希望亞靚仔從一而終啦,你話冥冥中係咪有安排吖,相反地若果當日我揀 左佢留低,咁佢點會識到佢既真命天女呢
究竟我分別响佢地既人生旅途上扮演住乜嘢既角色呢?係幫佢地嗰個,憶或係害佢地嗰個呢?若果你家陣叫我揀,我一定十秒都唔洗就會揀 靚仔,人隨住年歲既增長,睇嘢越希望嚟得簡單一啲,無需諗得咁長遠,眼光就少不免會流於膚淺