容忍我講多一編關於小女子同某男既故事, 之後佢地既對手戲應該唔會再响呢度出現架嘞................哦? 唔係, 唔係, 係不值一提啫
小女子同某男既相遇, 係响小女子既同事屋企既地牢, 當同事門嘻嘻哈哈圍住燒嘢食既時候, 小女子因為怕熱氣唔燒, 所以企埋一邊發夢, 某男就走埋小女子身邊搭訕, 佢居然同小女子談論貝多芬, 講古典音樂, 小女子一向自命清高, 不落俗套, 呢個男子真係幾與別不同噃, 之後出廳食亞同事整嗰兜西瓜盅, HiFi 播緊隻英文歌, 某男又即刻噏得出呢隊係 Commodores, 其實啲同事好多次提醒小女子, 話某男剩係得把口架咋
响小女子二十歲嗰年, 舉家搬左過去香港島居住, 小女子乘機申請調行, 於是轉左去環球大廈對面嗰間大分行, 每晚關左門都要等嗰十幾個 counter 埋好晒數, 錢入左倉先可以放工, 萬一有一個唔生性, 唔啱數要搵數, 就幾夜放工自己都控制唔到, 講番某男, 佢每個星期中放一日假, 有一次, 佢事先完全冇約過, 因為約親小女子都會拒絕佢, 就企响銀行門口挨住欄干等小女子放工, 睇吓小女子嗰日會唔會大發慈悲, 應承佢去街, 畀小女子啲同事見到, 走入嚟話出面企住個傻佬, 企左成個下晝, 問係咪有人識得佢, 小女子不以為意, 一放工出門口就畀佢叫住, 小女子塊面唔知擰去邊度好, 於是扮唔識佢, 直沖入去地鐵站, 頭也不回
小女子係 father’s spoiled child, 脾氣臭, 從未做過家務, 未煮過一餐飯, 食完飯連自己隻碗都唔會拎番入廚房, 小女子亞媽成日話老豆唔應該咁縱佢, 第時累左佢, 不過某男仲勁, 响家姐細妹口中佢係屋企既小皇帝, 乜好嘢都畀佢先, 乜嘢都係佢話晒事, 成家都會以佢為中心, 佢亞媽既重男輕女思想培育出佢極度大男人既性格, 當然佢既真我性情喺婚後先慢慢暴露出嚟
自從17歲半出嚟做嘢開始小女子就不乏男友, 不過遇啱對的人, 彼此人生計畫既時間表卻對不上, 某男一味死纏難打, 追唔到誓不罷休, 可能太過落力追既關係, 追到手之後越覺得嗰件嘢唔值得咁嘥力, 小女子諗, 自己係咪啲人話齋, 有咁耐風流, 有咁耐折惰
就算小女子名花有主之後, 去工會大飯堂食左兩三次午飯, 都會有人approach, 上編講過, 小女子一向唔興帶飾物, 包括介指, 亦係因為太大唔啱帶, 成日都要諗吓喺適當既時候又唔會尷尬地表明身份, 亦都會不時出現啱傾啲既男同事, 大家清楚知道自己既身份, 通常都係約出嚟飲吓嘢, 傾吓心事, 其實套吓料咁啫, 小女子成日同佢地講, 亦都係提醒自己呢一句 : “If I really want to find someone, that someone must be better than the old one.” 中譯粗皮啲講係<若果想搵過件, 嗰件一定係要好過舊嗰件>, 小女子覺得响一生中, 係好係唔好, 經歷過就算嘞, 無謂搞到自己既人生太複雜
沒有留言:
張貼留言