一個衰經理成就左兩件美事----之一

話說我初出道, 剛派到官塘某個山頭分行做 teller, 嗰度有一位 messenger, 即係依家好聽啲叫既辦公室助理員, 廿歲出頭, 個樣幾醒吓, 實質都係, 細分行, 人手少, 而佢真係好幫得手, 自動波咁出嚟坐 counter, 幫手填吓提款單, 存款單, 開吓新戶口咁, 聽講佢已經响呢間分行仆心仆命咁做左三幾年, 為既只係希望分行經理CWT推薦一下佢升做文員, 因為總部係無從知道你响分行既表現, 只可以靠分行經理既推薦, 其實呢個係好通常既做法, 況且升做文員只係一件好 simple and easy 既事嚟

C經理只係氹住佢, 如是者拖吓一年又一年, C經理跟本冇意有任何行動, 佢眼見繼續留响度under呢位C經理, 都係永世冇機會升架嘞, 唯有自己請辭啦

幸好佢修讀左英文以外既一種外語, 仲係好精嗰隻, 嗰陣時佢逢假日都會到XX人俱樂部, 同啲XX人打成一片, 可以實地練習吖嘛, 因為佢精通嗰種外文既關係, 所以入左一間航空公司做嘞,

睇到呢度, 係咪覺得只係被逼轉左份工, 都未覺太美啫, 但係過左三十年之後回望, 當其時若果佢唔係遇著呢位經理, 佢行既會係另一條唔同既路, 咁真係要多得呢位C經理, 成就左佢有今日咁好咁安定既日子, 我覺得人一生既命途似乎一早已經定好左, 沿途會有人(會係啲幫我哋既人, 亦包括啲害我哋既人)推我哋回番到原本已定既軌道上繼續前進

好, 睇埋下半場先下結論啦, 最近, 忽然收到佢來電,  大家講及呢幾十年來所過既生活, 原來佢已經移民左去加國一段日子, 已經响嗰度settle down 嘞, 佢今次回港小住, 係探望佢年老既爸媽, 佢有一對十多歲既仔女, 大嗰個開始入讀大學, 佢仲話有一日响加國行超市, 居然撞到C經理, 佢問C經理認唔認得佢, C經理話完全冇印象, 佢個樣又唔似有老人痴呆吖, C經理, 你居然唔記得一個畀你害過既人(可能太多, 記唔晒, 我都係其中之一), 咁你就一定唔會受到自己良心既責備, 咁你就可以用啲不帶一點歉意既心境, 平安地生活著  

呢一件係C經理乜嘢都唔做又不知情之下而成就既美事, 跟住落嚟要講既, 係C經理做左一件佢本人都勢估唔到會有個咁(美好)既結果既事, 事後佢後悔不已, 只會做啲損人唔利己既嘢係佢一向做人既原則 

 一個衰經理成就左兩件美事----之二

  V

  V

  V

 

 

 

今日心情:- 往年既今日天氣都係好炎熱, 當年仲係狂風暴雨添, 今日反而清清涼涼, 微風輕吹, 21年嘞, 但願能忘記, 卻總是會記起, 心裡面隱隱作痛......