annabelling: 6月 2010

2010年6月22日

鳳梨卷+曲奇+scones+蝴蝶酥

去到赤柱, 又點能夠抗拒Jenny’s 既誘惑呢, 响屈人寺則邊條樓梯行上一層就係嘞, 今次有幸畀我見到鳳梨卷添, 聽聞佢要特定既季節先會出現, 又會好快畀識貨之人買走晒個喎, 鋪頭店長-嗰位好優雅既女仕又話我聽, 以前啲曲奇係响鋪頭焗製, 但係份量有限, 唔足以應付大量客人, 好多時都會售罄, 令客人撲空而回, 所以依家係响工場製作, 每日取貨, 哦, 明白晒, 以往你只要追蹤住焗曲奇所發出既香味, 就會引領你到佢鋪頭, 啲嘢係咁架嘞, 一利就有一弊

當初以為呢隻鳳梨卷啲味道咪同台灣嗰隻差唔多啫, 我真係<超錯>, 佢啲菠蘿茸嗰種香味係獨有既, 好似話係指定用某個地方出產既菠蘿, 所以唔係全年都有, 總之就一試難忘啦 HK$75 (17 pcs)

曲奇真係好鬆化, 拎都要小心啲, 有一款係包含果仁响裡面既8種口味, 我喜呢款4種口味多啲, HK$60 4-mix ( 4 種款)

銅鑼灣 CRUMBS scones 提子味、朱古力同芝士味, 佢係一大底用刀切成四方型, 唔係用模切架, 提子乾同人唔同, 明顯有處理過(焗過?), 好得, 芝士味就唔夠出, 整體嚟講都好鬆化, 但係睇吓個袋幾油, 耐唔耐食吓算嘞

曲奇四重奏响跑馬地開左分店, 佢既出品蝴蝶酥, 牛油味同甜味適中, 又夠香脆, 蝴蝶酥其他大路做法係切好一塊塊之後洒砂糖响面, 或者卷好左之後將砂糖碌响外邊先切, 而佢應該係成底洒左糖响面之後先卷, 然後切, 所以咬每一啖都食到有香甜味, 咁做好有難度, 糖落多左就會唔脆偏硬, 幾考工夫架, 呢個真係冇得彈, 要彈都係價錢方面卦, 略貴咁啦, 不過一分錢一分貨嘛, 值既

赤柱-德國餐廳

呢篇網誌原發表於2010年6月22日, 不幸被惡虎吞食到冇影!!!

幸好有 back up http://annabelling.blogspot.com/2010/06/blog-post_22.html

King Ludwig Beerhall <<2010-5-14>>

星期五有冧歌送飯, 露台就有靚海景睇

呢位Filipino(菲律賓男歌手)自彈自唱, 好投入, 幾好聽

呢位Filipina 就好 hea, 眼神唔多友善, 好似怒啤緊我

點啤酒嗰陣, 個餐廳經理逐一介绍, 仲話有隻係佢地既品牌, 係點係點咁, 之後我地都係叫番上次嗰隻, 點餐嗰陣, 佢又推介吓呢樣嗰樣, 逐樣介绍吓咁, 點知我地都係叫番星期五先有既 $399 dinner for 2, 我地呢啲, 點嚟點去都係嗰幾味, 好聽啲咪話係長情, 專一囉, 嘥左佢一輪口水添

食食吓, 又有人走埋嚟, 問你覺得啲嘢食點呀, 呢啲場景, 唔係响西片裡面啲高級餐廳先會出現既咩, 今時今日既香港地真係唔同晒喇

香芒雞絲凍湯, 個吉碟係雜菜沙律配風乾火腿有parmesan cheese,black olive, 仲有農夫包配牛肝醬及芝士香草醬(請拉落啲睇農夫包 2008-3-10)

燒蝦帶子串配檸檬牛油汁

燒豬肘配燒薯及酸椰菜皮燒到脆卜卜,皮下脂肪唔多,唔太油膩,有酸椰菜中和番

香草芝士洋蔥麵團茄汁底+香草+芝士麵團

甜品拼盤 dessert tree (有齊 5 款)

去年今日此門中人面甜品相映紅

人面不知何處去甜品依舊笑春風....................詩興大發, 皆因 : -

2009年一月有人退休在此擺下歡送宴, 公司規定女同事55歲退休,“O” 咀

<<2008-3-10>> 麥啤

農夫包配牛肝醬及芝士香草醬

呢個汁有波菜架

兩年前既你同依家冇分別, 歲月並未為你添上痕跡

餐廳依舊在, 幾度夕陽紅

2010年6月21日

Barbara Padilla in America’s Got Talent

2010-6-19响明珠台America’s Got Talent睇到一位30零歲既Barbara Padilla唱左首Opera, 佢介紹自己係housewife (家庭主婦)而佢個Baby girl ( B女)係要話亞媽係singer (唱歌的), Daddy抱住左 B女, 佢猛擰轉身不停咁話 Mami is a singer, Mami is a singer, 好cute, Barbara梗係响 B女面前, 一住做家務, 一住唱歌頂嘞, 佢既歌聲令到評審同觀眾們都非常驚訝讚嘆, 最後當佢拉完左幾分鐘嗰粒高音, 全體企立, 拍爛手掌, 好嘞, 重點係佢唱完呢隻歌之後, 佢居然話佢係, 佢係..........

http://www.youtube.com/watch?v=Xk3Qpr9eac8&feature=player_embedded

佢係cancer survivor, 5 years (癌症康復者, 5年喇), 更加令人感動, 佢似乎完全戰勝癌魔, 生埋baby, 仲夠氣過平常人添

2010年6月20日

赤柱

2010年6月16日

遇鬼記------之二

開始返左人生第三份工都差不多一年嘞, 覺得呢份工可以有排做, 應該會係你唔炒佢佢一定唔會炒你咁(世事無絕對, 容後再談), 於是買左一間位於香港島一梯兩伙, 窄窄長長既屋, 間屋裝好修但係未正式入去住, 有日我地放左工响中環買掛牆鐘, 買夜左諗住返新居瞓一晚, 行到街口, 見到泊晒好多報紙採訪車, 入到大廈大堂, 見有警察, 記者响度, 看更話我地聽晏晝有人跳樓, 唉, 都上樓啦, 唔通又搭一輪車返舊居咩
一入到屋, 已經聽到幾嘈吓, 係由屋尾廚房嗰邊傳嚟, 於是入廚房斜望上去, 嗰個單位著左燈, 聽到把女人聲, 邊喊邊鬧 : “你個畜生, 累死我個女…” 事發單位就正係我隔離既上一層
第二日睇番報紙, 有個女仔响廚房後街嗰邊跳樓, 女仔係响髮型屋做化妝既, 佢做IT 既男友另結新歡
過左幾日, 襯放假我買左啲家庭用品呀濕星嘢呀咁, 準備放低响新居, 中午時份, 冇人出入, 入lift之後, 禁左我個層, 個腦仲一路諗緊有啲咩未買齊, 個lift上到咁上吓, 一開lift門我就好自然行出去轉右準備開門入屋嘞, 哝, 乜我個門口唔同晒既, 一擰轉頭就見到對面單位門口燒住一支長蠟燭, 又放左啲生果呀嗰啲, 我知驚嘞, 我响事發嗰一層呀! 頭先佢响個lift度, 我剛才同佢同lift 呀! 嘩, 驚到腳都軟, 我諗緊拉開道防煙門, 行樓梯沖落一層, 但係再諗, 去唔到我屋企架, 交义樓梯, 單去番單, 雙去番雙, 呢個咁狹小既空間, 前無去路, 佢响度呀, 响我身跟! 再望吓, 居然部lift仲開住道門, 唔理喇, 即刻沖番入lift , 個lift 自動關門落番一層我屋企, 諗番轉頭, 冇理由格, 剛才我响上面嗰層, 又出lift 行到人地門口, 又轉回頭諗住行樓梯, 又返番轉頭去搭lift, 都繞攘左幾分鐘啦, 個lift 喺一兩分鐘冇人出入就會自動關門落番地下架嘞, 係佢一路响度幫我禁住度lift門, 等我入番去呀! 其實佢應該係冇心嚇我嘅, 係佢要番屋企啫, 之後, 我响嗰度住左十年多, 個lift從未試過停錯層呀
發生事之後, 我都成日見負心男同亞新歡一齊返去嗰個單位, 好似若無其事咁, 仲有, 亞新歡居然响我公司樓上啲公司仔返工, 負心男有時仲响公司樓下接亞新歡放工添, 過左一排, 我就冇見佢地出現嘞, 而事發單位十年後以低過市價少少既價錢賣出左