噚晚聽光明頂, 陶傑提咗一句, 將炭燒雞蛋仔申請做世界文化遺產, 嘩, 咪就正係早兩日前我嗰篇網誌嘅第三個提議, 有好幾次佢提出嘅點子同我嘅諗法一樣架, 所以我推斷佢可能有睇我個網誌, 真係勁開心呀, 其實邊個嚟過, 有留言冇留言, 我都一樣咁開心架!
(陶傑睇到呢篇嘢, 哽咗佢算喇, 以你咁醒, 千祈唔好入嚟澄清話冇呀, 咁即係此地無銀啫)
嘻嘻, 開完玩笑喇, 其實, 或者, 大有可能, 實情咪係. . . .英雄所見略同囉, 即係我有陶傑嘅聰明才智, 冷眼看世情, 睇嘢夠透徹, 有諗頭. . . .再講, 就會引起觀眾不安, 轉台!
以上都係我响度自我吹噓, 自大狂發酵膨脹, 可以直接跳過!
睇西劇我剩係鍾意睇查案劇, 因為可以邊睇邊估吓個兇手係邊個, 今季 Mentalist, Castle 都相繼結束咗, 好彩, 仲有 Bones 同 Medium 撐住, 人生先有番啲樂趣, 不過佢哋係响8點半時段, 所以到11點就迫住回歸陶傑個電台節目-光明頂嘞, 我嘅記憶係維持到三日左右, 有時仲會亂晒次序, 記得就係:-
噚晚嘉賓係黎彼德, 星期五話題會比較輕鬆, 講吓以前好多度都食得到好嘢, 所以有提到雞蛋仔囉!
再上一晚嘉賓主持係鮑偉聰, 講點樣解決內地孕婦逼爆香港公立醫院, 好好笑, 笑到碌地, 佢提議公立醫院加入炒位行列, 價高者得, 跟住將啲錢分番畀公立醫院嗰班婦產科嘅醫生同護士, 仲有, 幫瑪麗, 伊莉莎伯, 威爾斯親王改名, 改咩名??? 總之畀佢笑鬼死啦!
再上兩晚講最低工資, 弊多於利, 嘉賓係區議員周潔冰, 我幾喜歡佢, 我仲喺佢嗰區時佢好有建樹
借用完陶傑嘅名氣, 醒番個廣告畀佢, 免費嘅, 今個星期開始, 佢一三五响有冧把嗰張免費報紙有個專欄, 佢有時誇係誇咗啲, 不過夠幽默, 夠抵死!
可能聽得佢多, 都受受哋佢影響, 人哋一面倒咁既睇法, 我偏要從相反角度睇, 咁, 反而會發現另一番境界! 試試吖!
沒有留言:
張貼留言