亞「托腮」响J2依家做緊嗰套Mr.Brain裡面, 破案全冇難度, 乜案件都畀佢諗通晒, 全靠佢一得閒就搣隻蕉嚟吔吓, 吔蕉會令到人頭腦聰明, 起梅花點既蕉仲有防癌作用添, 响西灣河有一男一女疑似係老闆, 行先人好多, 五六年前已經知道香蕉係咁有益處, 於是開咗呢間細細既餐廳, 專門用香蕉嚟整嘢食同嘢飲,
▼ Virgin Colada= 香蕉奶昔+菠蘿粒, 好香好滑, 真材實料, 又有菠蘿粒可以o趙吓, 唔鍾意香蕉既話, 仲有芒果同埋strawberry soother 酸酸地可以選擇
▼ 今次我叫咗呢個番茄芝士焗豬扒飯, 係冇包括香蕉嘅, 佢除咗有好多番茄之外, 仲有青椒同埋秀珍菇, 啲芝士拉出嚟係一絲絲架, 好似話係用咗cheddar cheese, 下次個肚有多啲空位先試其他, 聽聞蕉蕉多士都好掂
▼ 我落幾級樓梯, 坐响一個細細地既小天地, 等我帶你由我右手邊逆時針走一圈
▼ 好鬼鍾意呢句:「別看我, 看路」,係啲靚女講既對白嚟
▲ 雖然樓梯都有好多字提示叫你小心, 但係佢仲會真人發聲提醒你好多次, 長氣過啲亞媽, 佢亦都好細心, 因為佢連個餐牌都襯到痺, 係紅色底, 對老花眼濛起晒都唔多睇到, 佢即刻遞咗個白色底既餐牌畀我
▼ 明益班學生哥(妹)啦, 讀書至緊要有個聰明既腦袋嘛, 都好為下一代著想啫 !
▲ 地址呀 ! 露底處 !
講開吔蕉, 又記番起嗰套郎如春日風都幾開頭既一個場景, 响校園草地上, 呂奇打開本書遮住塊面, 阻擋陽光,個頭就枕咗响寶珠姐個大脾度, 珠(拍拍奇) :「吔蕉啦」, 遞咗一條蕉畀奇哥, 奇(發哆):「唔….唔制, 我要你喂我」, 珠吃吃笑, 將一條蕉連皮塞咗入奇哥個口, 然後就互相追嚟追去, 打嚟打去咁
沒有留言:
張貼留言