Peter, Paul & Mary 1960-1970 呢黃金十年, 我係錯過左既, 聽聞Mary同 Peter & Paul私底下冇偈傾, 但係响台上三位又出奇地夾, 佢地既和唱可以講話前無古人, 後無來者, 而我既偏好係專鍾意埋啲我上嗰代(+再上嗰代)既嘢, 自細都係咁架嘞, 亦比較喜歡聽慢歌, 所以對於呢隊三人組合所有既慢歌, 都非常之喜愛
佢地有一首快歌“A Soalin”, 嗰時無乜關注到佢, 覺得佢句句都係好急速hur hur 聲咁去, 近期先了解呢隻快歌其實係唱盡窮苦人家既慘事呀, 哦, 原來佢地係唱緊 : -
唏浩, 鬼叫你窮呀, 頂硬上, 唏浩, 頂硬上,
Hey ho, nobody home, meat nor drink nor money have i none
Yet shall we be merry, hey ho, nobody home
屋裡面鬼影都冇隻, 冇肉, 冇飲嘢, 又冇錢, 梗係閃啦, 仲响度問我地會唔會開心呢可? 唯有望上天打救啦! 呢隻歌令我回憶起中三有一個學期, 為左買支木結他, 不食不飲既嗰段窮苦日
子
每朝起身, 會見到响台上面, 有一杯奶茶, 隔離疊住三個一蚊銀, 由屋企行百級樓梯落到官塘道, 過條馬路到開源道口, 搭3毫子VAN仔到官塘碼頭, 用月票搭船去北角, 跟住用月票搭中巴到學校附近, 多數會响快活谷士多, 用2蚊雞訂定中午飯盒一個, 通常係蕃茄肉片, 炸菜牛肉呢幾味, 食完飯飲番一支維X奶, 原味3毫子, 麥精就4毫, 回程差不多一樣掉轉嚟咁, 不過响官塘碼頭就搭15B番屋企, 兩粒腎, 好, 埋單, 計數, HK$3 - 0.3 –2 - 0.4 - 0.2=HK$0.1, 嘩, 每日儲到一毫子咁大把, 儲成世都儲唔到個結他既錢啦, 乜講啲嘢咁似依家嗰啲有潛質樓宇準買家嘅, 亦係全靠經過中學嗰段洗一分一毫都要諗過度過既日子, 訓練到日後啲數口咁精 好, 嚟個決定, 中午不飲不食, 由屋企到碼頭來回都行路, 經過開源道↓, 咁就一個仙都唔駛洗, 3蚊就可以完完全全儲起嘞, 反而正因為咁, 有 2件好事响我人生當中發生
↑取道呢個側門去官塘道只需行一百級樓梯左右,
樓仲起緊嗰陣我哋試過响右邊爬上嚟,
開初時張椅嗰處有對夫妻檔賣白粥腸粉, 幾粒腎, 好滿足
到中午放食飯, 唔畀留响班房, 會鎖門, 同學一係去飯堂, 一係出去搵食, 得番一支公, 冇入就冇出, 無所事事, 坐响樓梯轉角位, 有功課就做吓功課, 冇就溫吓書咁, 打發吓啲時間, 到咗中三學期尾派成績表, 係排住名次, 由第一名開始叫出去, 通常係訓醒一教都到未到我既, 今次好快就叫我個名, 那位班主任, 又係英文老師, 講左句,“unbelieve, huh ? ”我開心過頭, 未及了解佢呢句咩意思, 好似有啲侮辱成份咁喎, 我嗰期考第8, 未先, 等我講吓我啲往績, 中一, 考尾二, 亞媽話仲係咁既成績, 唔好讀嘞, 去做工廠妹啦, 唉, 發少啲白日夢, 讀吓書囉, 中二嗰年, 考第十, 係由尾數番上嚟呀, 死未
經過嗰期不飲不食之後, 人冇長高過, 人地話女仔中一中二就會停止長高, 我當佢講得啱架嘞, 不過高番2吋會好啲囉, 唔駛大啲嗰時著住對4吋高踭鞋落唔到條螺絲轉 ↓
要改行幾百級樓梯番屋企, 而最大得益係瘦到身形變到標準晒, 直到今時今日都保持住, 從來唔駛為減磅而傷身傷荷包
↓講番, 拎住儲夠既錢, 就由跑馬地爬過一座山去到銅鑼灣老豆工作既銀行
from internet 
睇番Peter, Paul & Mary响1966年上電視唱Early Morning Rain , Mary纖瘦身軀配埋把金色長髮, 好索, Peter & Paul頭殼頂仲有好多頭髮, 嗰時既一切一切, 都係咁美好
沒有留言:
張貼留言