鏞記酒家-甘穗煇先生

廿幾年前, 我用左差不多兩個月既人工, 仲要賣埋一手港機工程畀亞媽做盤川, 去左一個日本九州鹿兒島超級豪華之旅, 事緣我有一位女朋友既爸爸, 佢老闆話出錢請佢去旅遊, 多謝佢呢幾十年嚟咁幫得手, 跟住佢番去問佢老闆, 可唔可以請埋老婆呀, 兩個人有伴啲, 回覆番嚟係“好”, 佢又番去問佢老闆, 兩個老嘢乜都唔識, 可唔可以請埋佢個女呀, 後生識嘢啲, 回覆番嚟又係“好”, 即係話佢老闆請晒3個人去旅遊啦, 佢個女就搵埋我去, 可以同佢同房吖嘛, 女朋友既爸爸做嘢既地方就係鏞記酒家, 而呢位咁慷慨咁有人情味既老闆就係甘穗煇先生嘞

9年後, 我做事嗰間銀行剛停止開門營業, 每朝帶住4歲既小女兒返公司, 坐喺度等運到, 平日耐不時中午都會去鏞記外賣個义燒飯, 係用一個紅色既四方紙盒裝住, 一碗飯倒既份量, 有一顆青綠既菜心, 當然主角係好正既义燒啦, 仲有幾片切到薄薄淺橙色既滷水墨魚添, 嗰時銀行已關門大吉, 時間比較自由, 為左避過中午繁忙時間, 我地通常2點幾鐘先去到鏞記, 坐低就叫一碗义燒飯加一碗窩蛋碎牛粥兩份食, 因為唔係大客, 啲伙記唔多招呼你, 你有你坐, 佢有佢當見唔到, 慣架喇, “6如”咪又係咁, 嗰日我地又如常呆坐左一陣, 响貼牆卡位嗰邊有一位著住唐裝衫褲, 則則身坐, 挨住牆同卡位椅背之間, 左手既手臂掛住咗响卡位椅背上面, 同佢面對面坐既茶客傾緊偈, 歎緊茶既老先生, 叫住個伙記, “去睇下嗰面嗰位客人要乜嘢”, 一個伙記即刻仆到咁跑埋嚟, 另一個仲沖緊過嚟, 噬起棚煙屎牙笑騎騎幫我落單, 嗰次係我同甘老先生有過既一面之緣, 甘老先生已於2004年以96高齡辭世嘞