紅色線範圍內係三四層高嘅矮樓群, 30/4 我親身落區巡視完, 好 update架
有個地產佬曾經話過我聽, 呢度嘅規劃係唔能夠抽中間一幢出嚟重建, 要成排成列咁嚟, 唔知佢有冇呃我呢?
回想起 N 年前, 嗰位準頭有肉(內心無毒?)嘅地產先生帶我睇過新村街一幢樓宇 (下面張圖再行過幾步, 上面張圖右下角都寫咗個大廈名出嚟) 較高層數嘅一個單位,
好喇, 一推大門入屋, 嘩, 不得之了, 成個尖沙咀夜景, 就响正你面前, 靚到好似一幅畫咁, 我作為一個精明嘅消費者, 梗係第一時間問,‘係咪永遠海景?’, 於是佢咪講咗剛才嗰番說話過我聽囉, 不過已經唔關我事喇, 事關响第二朝大清早我哋去想再番睇多次, 人家話睇樓為穩陣計一定要日抖睇一次加嘛, 點知嗰朝上到去, 業主落晒匣, 爭在未放狗, 同層樓都一樣要講吓有冇緣份嘅, 我信架!
喂, 番嚟喇, 香港人吖, 呢頭又話唔做樓奴, 但係一講起樓就即刻精神晒,
講番轉頭, 我响嗰區出沒嗰十零年, 已經見証住北面嗰條線向入移咗一行, 即係我睇住銅鑼灣道嗰幾幢新樓起嘅, 通常都係貼近大街會起變化先架啦
依家左邊嗰條線又剛剛向入移咗一行, 地圖華倫街左邊已被搞定, 尚巒 (1) 正在熱賣當中, 而佢行前番幾步嗰啲矮樓已經變走晒, 得番塊空地 (2), 個地產商已經用木版圍住咗佢, 宣示主權, 地圖華倫街右邊(即係下圖有個招牌嗰處)有個公廁, 遲啲唔知會唔會連個公廁都做低埋 !
(1)
(2)
廢噏一輪, 唔住過嗰處真係冇感覺個噃, 講食就人人啱聽, 唔食都可以憧憬一吓嘛,
★ 炳記 ★
↓ 種類選擇唔多, 靚就夠晒喇
↓ 泊埋牆咁坐, 或者坐响帆布底
↓ 全港九最靚嘅奶茶, 喺呢度! 全港九最靚嘅豬扒, 喺呢度!
仲有炸雞翼, 多士都好掂, 佢係即叫即整嘅, 所以正得有道理, 想食好嘢要就有耐性
我唔講太多喇, 費事俾人話我做媒, 其實亦都唔需要吖, 佢成日都係咁多食客
襯天氣未太熱, 用2,3拾皮自己去以求證一吓啦
↓ 貼住嗰張紙係話, 平日開朝八晚五, 逢星期二休息
↓ 响銅鑼灣道行, 搵啱個街口先行入去
呢檔嘢聽聞係老豆開落, 跟住傳俾佢啲仔, 所以依家係兄弟班,
我係點開始認識呢檔嘢啲靚靚奶茶嘅呢? 事緣N年前有一天, 佢其中一位兄弟搞咗個function, 熱情招待我哋去佢屋企大吃大喝, 坐坐吓佢話揸架車落茶擋拎啲奶茶檸茶返嚟俾我哋歎歎, 我先知道佢家族呢檔嘢响大坑區幾咁把炮同名聲嚮噹噹!
↓我實際冇响呢啲三四層高樓宇住過, 不如去睇睇街道景致吖
↑ 有車之人, 對大坑區可能唔會感到陌生, 因為當架車有乜頭暈身興, 車主好多時會駛嚟呢一帶醫醫佢, 超過半個世紀架喇, 但係近幾年, 車房漸漸少了, 新式食肆就越開越多
↑ 佢專登開間分店响呢處, 就晒你, 加埋誠意嚟打動你,
話時話, 我覺得佢個 logo 揀得好, 成個金錢咁, 抵佢發 !
沒有留言:
張貼留言