錯過咗升職機會

國家政治我會盡量唔談論,兩篇前講過,我正努力學習緊愛佢多啲,包括埋佢既老百姓,當你心裡有愛,你就會將佢既優點擴大,將佢既缺點縮小,繼而對佢偶爾既失誤作出包容,有時你唔好話人哋唔關心你,係你成日直接將佢跳過,連機會都冇畀到人家!
趙先生事件應該會以申請保外就醫,跳過重審,直接了結,呢件事又令我記番起我打既第二份銀行工,做咗兩年TELLER之後剛轉型去咗中環總分行做會計工作
我一向有咁既諗法,會計做上去可以開間會計師樓,自己做老闆,但係做銀行,就算做得幾好都唔會開到銀行,即係成世幫人打工,能夠做會計工作係我既心願嚟,我一邊繼續考會計師試,一邊默默地工作,務求做到自己份嘢妥妥當當,更從來唔會有嘢會煩到老細,可能因為咁佢跟本唔為意有我既存在,
嗰年我放咗兩個幾月假去做件女人最偉大既事,放假期間我既下屬,其實只係工種上,我哋既title一樣,是一位頗西利既女仕,去考咗升職試,仲interview埋,我頗感荒謬同無奈,又到一年一度加人工,我因為title所限,只象徵式加$200,呢一樣我就最唔忿氣,於是同副經理(正經理放大假兩個月)講,呢次係我呢世女最有勇氣既一次-出聲為自己討回公道,佢第一句畀咗個定心丸我,佢話我下屬見咗都未必升到啫,我知佢亦諗咗好多方法,但係都行唔通,人事部唔會為咗你一個去從新作一個新試題,又唔會破壞規舉唔考就升你,真係畀咗個難題人家
如是者糾纏個多月,期間幻得幻失既心情,好折磨人,好難受,因為壞情緒引發起既病,食咗一年藥先至好番,廿年後,因為某啲嘢既刺激,個病又番返嚟,若果趙先生案件重審,可能對佢嚟講係會公道啲,但係佢將要再經歷既痛苦,唔會比我當年少
個多月後經理放大假番嚟,寫一個report畀人事部,大致講到因為某職員放假既關係,錯過咗升職試,其實該員工工作表現係可以升任更高職位,酌情先將薪金調整多幾百元,佢好容易就將呢件麻煩事簡單咁解決咗嘞
(辜勿論趙先生事件一審有冇錯失,依家咁既解決方法,畀有關人仕有個下台階,諗深啲其實同經理用咗呢個方法暫且解決我呢件事都有雷同之處)
受過慘痛教訓,學識咗要順住個遊戲規則嚟玩,唔好搞錯,唔係努力發奮做嘢,係努力發奮扮嘢,之後跟住嗰幾年,每年升一級,升職事小,狂加薪緊要呀,升職加一次,年度調整又一次,percentage仲係疊上去計架,好和味,我响中環總分行做會計既嗰9年,加埋收尾嗰一年齋逗人工剩係番去等運到,係我打工既黃金十年,亦都包含我成世人最幸福既嗰幾年
今日食完lunch漫步經過西港城嗰間 Das Gute,買咗啲幸福(家陣要買,悲哀!)番公司,仲係double上添呀,
▼鮮奶木頭包,好正架!左手邊用手機影,效果差咗啲