新聞故事——
鵝頸橋活化 通透掃悶氣
婦女會變玻璃屋 引維港清風
建成已三十八年的灣仔堅拿道天橋（俗稱鵝頸橋），明年初將有一番新景象！位於橋底多年的香港各界婦女聯合協進會，將一洗過去予人外貌猶如公廁的誤會，將搖身一變成為萬呎光亮玻璃屋，並利用喉管引進維港的清風及太陽的自然光，將陽光與海灘的感覺注入天橋底部。另一邊廂，區議會耗資六百萬元，活化橋底柱的工程，正如火如荼推行，料橋底勢將成為旅遊新景點。記者郭美華
於一九七二年落成的鵝頸橋，被視為銅鑼灣和灣仔的分間線，一邊是銅鑼灣時代廣場的堅拿道東，另一邊則是鵝頸橋街市的堅拿道西，該處是商舖旺區，日夜人流如鯽，其中有婦人為客人打小人，最為人熟知，更成為不少遊客到訪的景點。不過，橋底建成已三十八年，予人殘舊、黑暗、骯髒的感覺。
位於橋底近灣仔消防局一邊的香港各界婦女聯合協進會，在上址多年，知道的市民不多，中心近年獲政府撥地，及郭德勝基金贊助一千萬元，為中心拆卸重建，來一個大變身，新中心面積增至一萬平方呎。
殘舊空氣差感覺骯髒
負責該項目的建築設計師何周禮表示，以往中心使用石屎牆，加上橋底較暗，往往予人黑箱作業的感覺，甚至有人誤會它是一所公廁。因此，中心拆掉後，他刻意將中心打造為全新玻璃屋，佔一半外牆是採用通透玻璃，市民行過，內裏諮詢處、咖啡室、電腦房、多功能室等一覽無遺。
鵝頸橋底人車混雜，空氣不流通，何周禮計劃建造一條長一百八十米的鋁質管道，直徑三百五十毫米，依附在橋底，以伸出告士打道海旁，抽取維港清風。清風再經過中央冷氣系統製冷，為中心提供冷氣。同時，何又計劃在中心裝上玻璃鏡，以潛望鏡原理，將陽光折射入室內，達致節能效果。
不過，何周禮慨歎，工程早在今年初開始，但政府至今仍未批出有關喉管依附在橋底工程的申請，他擔心最終抽維港清風的概念會被擱置，造成「觀音頭，掃把腳」局面，他促請有關部門加快審批，讓工程可於今年底完成。
區會批600萬元美化
灣仔鵝頸橋可謂港島區的大動脈，白天黑夜的景色各有不同，為進一步推廣，灣仔區議會批出六百萬元，在橋底開展美化工程，包括為十二條橋底支柱，鋪上中國「二十四節氣」的圖案、加設掛燈，同時將橋底公園兩米高的圍牆拆去，提高通風效果。
灣仔區議員鍾嘉敏表示，整個工程將於明年三月前完成，但以目前進度來看，橋底悶焗情況已有明顯改善，在橋底聚集的老伯和候車乘客的碰撞紛爭，也大為減少。
工程料明年三月完成
何周禮指出，本港地小人多，十分擠逼，建議政府善用橋底空間，他舉例指，台北有橋底設置兩層高的泊車位，周邊有花檔和寵物店等，極具特色。他建議，灣仔鵝頸橋底可作仿效，如將大型貨櫃範圍改裝成小型學校或非政府組織辦公室，放置在橋底。而坐擁維港海景的上環信德中心橋底，則可建三至四層高的平價特色旅館，供外國背囊遊客入住。
***************************************
唉, 今朝睇到呢段有關改動鵝頸橋既新聞時, 又一次受刺激, 一來我仲係個納少少稅人, 二來我成日會响處<浮游>加嘛, 好關我事架, 其實呢件事件除咗令到有啲人可以接到一份大project 發吓大財之外, 佢哋有冇諗過, 啲老外就係鍾意佢依家咁既樣, 一邊睇吓打小人, 一邊聞吓嗰浸霉味, 從而散發出嚟既古早味? 仲有呀, 有好多我哋呢啲人未老, 心已老, 咪即係食古不化既老頑固囉, 要成日去番吓呢啲地方, 一定要見番舊陣時啲場景, 先可以回憶番舊日既美好時光, 賴以慰藉心靈既缺口!
我覺得依家香港政府最興就係先摌走晒啲舊嘢, 去搭建一個華麗舞台, 然後安排一班演員, 去上演一幕堂而皇之既戲, 就算班演員好努力做到好自然好生活化咁, 但畢竟都係响度做緊戲, 而好好既戲亦都會有落幕既一日, 曲終人盡散, 留低既只係空空既舞台, 剩低既只有不勝既唏噓
睇香港既勢頭, 誓要將啲舊嘢連根拔起, 相信我哋只可以近近地去吓澳門, 又或者搭兩個鐘頭飛機飛去台灣, 先可以索到嗰浸古早味嘞
我仲要同啲警察叔叔講句, 真係唔好意思, 唉, 我呢個正一港燦, 成日誤會咗啲警察係<食蕉>, 又將啲食環署職員當咗係警察, 事關好似係97之後既事, 我唔太肯定, 應該係我仲未update自己個腦嗰時, 警察大佬換咗新制服, 件新制服上身係一件淡藍色裇衫, 配埋條藍扯褲, 好一副勞動人民既裝束, 另外仲要外加件深藍色機裇, 哩, 咪就係啲表叔最興著既嗰啲囉, 只係表叔嗰啲係軍佬綠色之嘛, 諗落咁既改變係啱架喎, 你哋唔好成日話有關人等响度擦亞爺鞋啦, 97後啲眼光梗係要同我哋親愛既祖國睇齊架啦, 人哋用心良苦呀, 愛國無罪, 係你哋啲人諗多咗咋......
沒有留言:
張貼留言