一個衰經理成就左兩件美事----之二

「有錢唔一定快樂,但係冇錢就一定唔快樂」

呢句係官塘某山頭分行C經理既名句,話說佢盡可能唔recommend人升職,佢既原因係若果他朝佢recommend既嗰個人犯錯誤,揭番佢個file睇吓當時係邊個人題名升佢,咁題名人就可能會受到影響架嘞, 佢為咗自保既呢個自私行為,累到一位等咗3年,只係望佢recommend佢升做clerk既後生仔惟有自己出去另作發展,反而咁仲有一番作為添,幾十年後當然可以下定論啦,一個衰經理成就左兩件美事----之一 ,C經理點解唔諗番轉頭,人人學佢咁,佢本人又點上到呢個位呢

在C經理未上山做分行經理之前,佢畀人逼要提番一個人升職,左諗右諗,左度右度,就呢個啦,反應有啲遲鈍,個子矮小(呢點作為男仕比較蝕底)睇怕佢上去見完都唔會pass嗰隻,今鋪定當,唔知點解又畀佢pass咗喎,人材大有人在,以佢一個其貌不揚,日常工作表現平平既人,唔係得C經理,輪 乜 都唔輪到佢啦,自此之後,「小個子」感激C經理嗰份情度尤如佢既再生父親一樣,

有一位開山功臣,職位係客戶服務,制服都好搞嘢,有帽架,只做待客工作,以C經理個為人,點會要呢個職位既人吖,要晒teller好過,可以好零活咁做吓文職又得,做埋接待仲得,所以C經理嚟咗之後呢位即將踏入30大關既女仕就調走咗落裕民坊嗰間大分行喇,不過佢仲係山頭居民又係客戶,成家同山頭分行啲人諗熟,呢位女仕可能乖啲純啲卦,生活圈子狹窄,從來冇交過男朋友,佢亞媽替佢擔心,成日叫C經理介紹男仔畀佢個女,C經理不勝煩擾,佢又左諗右諗,左度右度,佢識得既成班仔入面至yap都算係「小個子」架嘞,於是就將「小個子」介紹畀佢,可能「小個子」要感恩圖報卦,恩人推介到,即收貨,唔駛幾個月,兩個新人拍住拖上山頭派紅色炸彈兼謝媒,呢次係我第一次見呢對新人,我覺得佢哋都幾襯,高度差不多,兩個都唔太多說話,踏踏實實嗰種,但係C經理居然沖口而出發自內心講咗句(應該係話緊亞女仔) 「咁都啱??? 」一年後,佢哋仲生咗個BB仔添呀

其實搵老公唔駛揀 啲 好 醒目嘅,蠢過自己仲啱,有你呃佢冇佢呃到你,作為老公,識得搵錢番嚟畀你,同埋到時到候識番屋企就夠架喇

其實我對C經理都寄于無限同情,C經理好似高高在上咁,現實中佢周圍有好多女人佢都唔得罪得,在工作上,分行細細得嗰10個人唔夠,已經有兩位官太(官太係乜 ?咪就係佢哋老公响銀行裡面擔任緊高職位囉),在家庭上,外母乸 極其猛料,開幼稚園,佢似外母大人啲學生仔咁,對校長-即係佢外母大人又敬又畏,佢只可以將我哋呢啲容許佢踐踏既人,盡情咁踩到扁    

我個為人係唔多熱衷參與同理會我週遭發生既事情,讀書如是,做嘢都如是,咁點解我知咁多我未嚟呢間分行既嘢?其實係一位30過外既女仕-AL好熱情咁用呢啲八八卦卦既嘢嚟同我扮friend換取我既友誼同埋信任,然後恨恨地督我背脊,可能我後台夠硬死唔去卦,唉,又响傷痕累累之中上咗職場既一課,下回分解