我唔買六合彩

若果他朝你見我發咗達,你問我係咪中咗六合彩,你就一定估錯,從某年某月某日起,我介咗買六合彩呢個習慣喇

為免仲想要中頭獎既你引起不安,聽完ABBA隻Money就算嘞,唔好再睇落去囉喎

Money, money, money, must be funny, in a rich man’s world=錢呀錢,响有錢人既世界裡面,一定好很有趣啫(等我感受過話過你知呀吓)

有錢駛得鬼推磨=Money makes the world go arround x 2,唔係好記得呢隻咩歌,不過最有印象係收尾嗰句:hey, big spender,唔駛去到歐洲咁遠噃,晨咁早去中環啲名店門口睇吓啲千奇百趣現象,幾多其貌不揚既闊佬等住啲店鋪開門衝入去搶住幫襯,店員家陣對住呢班豪客啲嘴臉都唔同晒架喇

▼

▼

▼

好,講幾個中咗六合彩既人既經歷,茶水亞姐話佢有個親戚中咗六合彩頭獎,佢兩公婆即刻辭咗佢哋份政府好工用嗰啲錢開咗間體育用品店,廿幾年前體育用品店係好熱門賺到錢嘅,但係由佢哋開鋪就開始走下坡,(係咪畀佢拖冧個市呢?)結果將中番嚟既錢蝕晒為止

亞女兩歲半未夠,有日抱住佢經過禮賢會,佢問我係咪冇錢錢畀佢讀書,唔知佢幾時聽埋聽埋就自己亂諗嘢,又一個教訓,要記住响仔女面前要慎言,佢對大眼睛整咗個可憐樣望住你,於是咪畀咗佢返附屬既幼兒班囉,復活節有個活動,旅遊車車咗去唔知邊處搵啲收埋咗既復活朱古力蛋仔,幾位家長閒談之間,話亞乜太中咗條六合彩之後就開始病,睇勻晒西醫中醫都搵唔到病因,錢銀都係身外物啫,但係傷身你都咪話唔驚

亞女開始上小學,教養,教養,唔只要「養」,仲要「教」家嘛,剛啱轉咗份好似幾安穩既工,於是好積極咁响港島區呢邊搵緊樓,嗰時都會妄想旨意一吓啲六合彩,嗰日下晝,一住聽住個電話話筒,一住對冧把, 第一個冧把,中!第二個冧把,中!第三個冧把,中!第四個冧把,又中!心裡面好忐忑不安,奇怪,完全冇興奮既感覺,只係猛同自己講,第五第六個,千祈唔好中,我情願捱世界都唔想病,呢次事件好似畀我預習咗一次真係畀我中咗頭獎既心路歷程咁樣,由嗰陣時起,我介咗買嘞,到依家更加冇要中六合彩既需要

以下李丞責師父講既呢單劫案係十年前發生嘅,嗰間鐘表珠寶店係喺新光後閘過幾間鋪位,係一位歌手個亞哥中咗六合彩頭獎開嘅,個槍手居然會睇中呢間位處鬧市只係一間佔半鋪既細鋪,仲要响人流當旺既中午時份打劫,本應劫匪已經得逞經馬寶道向住鰂魚涌方向走人,唔知點解(應該保險會有得賠)老闆突然衝出去同劫匪糾纏,結果被開槍殺死

風水奇譚—— 生人霸死地

2009-11-12

有人不相信，人是沒有永遠的富貴，也沒有永遠的閉翳（衰運），而一般人更相信，愈早富貴的人，衰運亦會愈早來找他，所以大家都認為，經過一番磨煉後，踏入中年或以後才大富大貴，會較為恰當，亦容易為人接受。

        早在上世紀九十年代初期，一位著名歌手的兄長，很早已成家立室，妻子更是貌似天仙，並育有一對子女，個人更在北角開設金舖，事業如日中天。筆者從他的親人口中得知，他當時的好運簡直好到極點，例如贏馬、中六合彩已是例行公事，勝利似乎是必然的。不過，人無百日好，花無百日紅，不好的事終於來了。

        某年某月，他在金舖埋首工作之際，忽然一名悍匪持槍衝入店內，威嚇眾人並大肆搶掠，最後劫匪掠去一批金飾奪門而逃。原本此事就這樣過去，最多只是損失了一批金飾，但不知何故，「好運的他」突現神來之勇，竟衝出店外，赤手空拳與劫匪糾纏，就在此時，劫匪為求自保，舉槍朝他的後腦……

        事後有不少評論，過往他事事都遇上好運，在危機關頭的一刻，「好運的他」便認為「幸運之神」永遠站在他的一方。

主持︰李丞責

▼

▼

▼

若果你一吓唔覺意睇咗以上嗰幾個真實個案,驚有啲人似我睇嘢既習慣,有時會由收尾睇番上嚟,我惟有咁安慰你啦,「中獎嗰啲錢查實係我既,我一路以嚟,著啲著啲儲响馬會嗰度之嘛」