記復活節長假第一天

開始五日長假, 上網碌(+look)晒啲新聞, 出廳睇埋婦女節目, 真係要出去走走嘞, 求其跳上架電車, 坐定先諗去邊啦, E…去跑馬地? 唔好啦卦, 去嗰處又會有太多回憶, 一轉彎就快快落車, 行經過時代個的士站, 點解會有女高音歌聲在空中飄揚既? 好似係馬路對面嗰啲店鋪傳嚟個喎, 唔怕趕客?

行到打小人天橋底,得一擋開,冇客,唔通冇晒啲小人?啲小人襯長假去晒外遊?

人和豆腐店, 讀緊書嗰陣時好出名, 成日都迫滿客, 嗰時嫌豆腐太cheap, 一次都冇試過, 家下話要耐不時食下豆腐,有鈣質喎, $10一碟魚肉煎釀豆腐有4塊, $12合桃露豆腐花, 嘩, 啲豆腐真係水準之上, 好滑, 好有豆味, 相逢幸未晚

上樓有間十文店, 有好多客, 可能啲人係入嚟避雨, 聽到香港人與香港人對話: “唔好响道買嘞,返屋企附近嗰間買啦”, “屋企有嘞”, 或者“睇落都係冇乜用, 唔好買嘞”, 總之都係好努力咁搵啲理由說服自己唔好買, 我都係其中之一, 但係普通話人就唔同喇, 完全係買啦,買啦…香港啲經濟就靠晒你地架嘞, 多謝晒

跟住入左間賣台灣野既, 伴手禮, 醬料都幾齊下, 左睇右睇, 睇下又問下店員咁, 個腦又自動波咁努力做野嘞, 不過待左响道成粒鐘咁濟, 都幫襯左小小咁啦

店員對話, “好靜呀, 係咪啲人去晒旅行呢可”, “係呀, 啲雨仲越落越大添呀”, 話未講完就咋咋臨出去營救佢啲放得較近門口既貨物,

好嘞, 係時候返歸喇, 又跳上架電車, 係去北角, 更加少客, 見到車頭有個男仔, 佢女友坐响前面另一架去筲箕灣電車既車尾, 一字排開啲毛公仔响車尾玻璃窗, 車緊貼住車咁行駛, 男仔就用佢個單反機, 又換番支近鏡咁, 猛咁影啲毛公仔,影到我哋架電車轉左彎準備返總站, 迫住收手, 唉, 年輕真係好, 總有太多既時間, 可以畀佢地隨便亂花,

諗起屋企冇菜, 又冇生果, 當然一定係冇餸, 去SUPER啦, 總會買到啲野醫肚, 經過商場, 睇下, 冇客消費, 所以冇人玩遊戲, 工作人員悶到數手指

一入到超市, 嘩…雙眼發光, 襯仲未洗介口住(其實未去check), 食多啲, 食多啲

記起雪柜有半份量搞好左既薯仔香草蒜頭包料, 拎出嚟焗左佢, 當飯食, 又學人搞下嘢貼小塊小塊芝士响面, 焗出嚟好怪相, 不過都幾好食

嘩,十五個大樣咋喎, 洗唔洗咁…….多舊魚呀, 留番大半(左上)聽日又一餐

嘩, 人生真美好

只是"近"黃昏