打工之路

要踏進社會做事,爸爸就安排一連串既銀行工畀我interview,佢總覺得打份銀行工,好似佢嗰時咁,穩穩陣陣,又好福利,然之後响銀行裡面揾返個對象,咁既人生就夠安定嘞,所以就算係佢銀行既Annual Ball,佢都係帶我去,其實佢啲同事請我跳舞,都係畀面佢咋,我地齋跳,冇話題架,仲有佢對銀行工既諗法都要改改嘞,响我做既第二份銀行工要清盤時,眼見兩公婆都喺度做嗰啲都幾旁惶吓,其中一個即刻要去搵番份工,最好仲係銀行工添,可以快啲繼續有番個低息樓宇貸款吖嘛,就算話呢個係個別例子,咁前排銀行話經濟唔好要裁員,咪又係兩公婆就會炒其中一個
我既第一份工係响SCBank做teller,10月3日做到10月2日,剛剛好三年,嗰時既風氣係响SCBank,第二發鈔銀行做到有番咁上下日子就會跳槽去第一發鈔銀行,我個人比較反叛,人咁行我偏唔咁行,亦唔想响工作上活在爸爸既指爪下,我要靠自己,寫求職信去面試,又好順利咁轉到另一間銀行,一做就超過十年,由10月1日(係重疊左架,之前份工扣減左幾日大假,可以早啲返新工)做到9月30日,好玄,又係一個整年
第二份工因清盤而即將結束,我當時話做左十幾年野,做夠喇,唔做喇,但係响嗰年既7月份,一個炎熱既下午,食過lunch,正慢步返回國賓,嗰道原本係card center,用嚟做左liquidation work,响新光後門既閘旁邊,我遇到了神仙(我當佢係架嘞,佢講既野都幾影響我日後既人生)於是乎响嗰年既10月中又開始我人生既第三份工嘞,呢份亦會係我最後一份工,就算佢頂唔順我啲臭脾氣而炒我,亦唔會有老闆頂得我住,所以係唔會有第四份工出現架嘞