大坑(三)

 ★ 浣紗街 ★
多情自古空餘恨，好夢由來最易醒。
豈是拈花難解脫，可憐飛絮太飄零。
↓ 我响浣紗街兒童遊樂場發現佢, 落花冇飄絮, 浪漫氣氛爭啲啲

↓ 大坑渠對到正, 大約喺銅鑼灣道90號, 就會見到浣紗街街口
一年有三天: 迎月, 賞月, 追月, 夜晚8點舞火龍, 就係喺呢處, 拍友可能會,‘哦!’ 頓然開竅
到時到候, 大坑坊眾福利會就會招攬一大班10歲8歲嘅妹妹仔, 嗰 3日著住唐裝小鳳仙, 提燈籠!

↓ 相中左手邊呢邊相信會有人認得出, 前排有貨尾居屋推出, 就係要去呢間房屋協會拎申請表, 呢邊大多數已經重建咗為新廈
剛搬嚟嗰陣, 呢個位置係幾幢有騎樓嘅唐樓嚟, 好似灣仔藍屋嗰種, 當年, 老豆响嗰度買咗碗雲吞麵上嚟, 呢, 要好似花樣年華裡面張曼玉咁款, 要拎埋個飯壺去買外賣架, 爭在老豆冇扭吓擰吓同唔駛行條長樓梯, 早知會撞到梁朝偉咁嘅型佬, 我實爭住落去買, 收尾同我做嘢嗰度個經理講開, 原來嗰檔雲吞麵檔好出名, 佢話夜晚專登揸架車去食碗雲吞麵做宵夜, 嗰列唐樓好快就拆咗喇, 我哋剩係食咗嗰一次咁大把咋
住响處嗰幾年間, 見証住嗰列幾間舊式茶樓茶居結業, 想睇番茶居裡面嘅風貌, 可以找找韓劇(SBS 2005)香港特急看看, 劇裡面仲有好多大坑區啲橫街同舊樓裡面嘅場景,
跟住無幾耐, 嗰列有一間豆腐鋪+賣報紙擋結束咗, 靚靚事頭婆响門口整布包豆腐呢幕仲好似响我面前重演緊
銅鑼灣道浣紗街口轉角嗰間士多, 幾年前又摺埋咗喇, 記得(小小肥)事頭婆好本事, 做生意賣嘢之餘仲煮到兩餐出嚟, 响士多同佢個佬兩人撐枱腳
依家, 嗰列更加畀一啲新式食肆所取代, 冇歷史價值, 唔講囉, 實情係我唔識講
↓ 由相嘅右手邊(第一張地圖嘅紅色線) 細冧把開始行入去, 請注意, 香港島冇幾多條街有呢種街檔架喇 .....下面張圖取自 www.tvb.com.hk, Thanks!

↓ 藥行已經超過半個世紀

↓ 呢間水電鋪都歷史悠久

↓ 睇佢唔出, 好耐歷史架喇, 老闆娘一個女人仔好叻, 做到有聲有色, 仲重新裝修, 橙紅色好搶眼

↓ 十三座牛雜個工場响呢處, 香噴噴, 引死人

↓ 行過咗新村街, 就會見到呢個浣紗街兒童遊樂場,
以前好求其, 放兩三坐搖搖馬响處就當係, 環境都幾差吓, 嗰時好驚驚會有壞人, 依家唔駛驚喇, 點解? 我仲壞過佢, 佢驚啲囉, 講吓笑啫, 其實係依家周圍環境乾淨晒, 可以好放心响處玩, 不過又超晒齡呢,
人生就係咁架喇, 永遠都係追住幸福條尾巴走, 當你差不多追到, 佢又會走快啲

↑ 以前成日行吓行吓唔多覺咁就行到嚟呢度, 爬上咗條樓梯就係大坑道,
左邊會見到勵德邨, 右邊就係真光, 真光行前少少就係虎豹別墅, 又會走入去遊覽一番, 因為係免費, 可惜嗰陣影相好昂貴, 仲記得佢係 4 點鐘關門,
唔上囉, 憨烚烚爬到上去唔知為乜, 出公園去番大街

↓ 條條樓梯都通到大坑道?
盡頭呢條企企樓梯, 得唔得呢, 等你哋行完話過我知, 我就一定唔試嘞

轉番出去, 行行吓經過嗰座好貴(x N)嘅新樓, 唔影佢喇, 費事同佢做勢, 不過佢有咩賣點咁勁秋? sell 清靜?
再行前幾步, 一望, E? 百雞? 唔怪之得區內啲士多都唔多企得住腳啦,
當第二時士他筆, 大乜镬都進駐埋入嚟, 呢處同外面嘅世界又有咩分別呢? 嗰陣在我嚟講, 更加冇再踏足呢處嘅理由嘞
我响呢帶出沒時, 有一位唔同分行嘅女同事, 上完 course 時大家同路返大坑, 有次佢話佢結咗婚, 搬咗過九龍住, 數年後, 忽然响大坑撞番佢, 佢話响大坑由細住到大, 唔捨得, 於是又買番番嚟大坑, 佢一條身由大坑嫁出去, 三年後, 拖多件大嘅, 加多件細嘅番歸