annabelling: 5月 2010

2010年5月18日

氹仔官也街

响氹仔一落巴士, 映入眼簾係呢座咁古典但係又油得好光鮮既建築物, 木偶餐廳居然身處其中?

記得廿幾年前搭的士嚟到, 周圍環境好黑, 好荒蕪, 餐廳一帶都係啲一層過既舊樓, 餐廳幾細吓, 要坐左响出面露天既地方, 亞闊佬男叫左好多嘢, 好似食家試菜咁, 燒全隻乳豬仔, 燒沙丁魚, 同後尾我去葡萄牙食過既差唔多, 魚燒得比較乾, 反而則邊啲配菜呀, 薯仔呀仲好味, 最有印象係欖形既馬介休球, 好有水準, 好掂, 略咸, 魚肉成份顯然比薯仔多

講起闊佬男, 唔好搞錯, 佢唔係有錢佬, 只係 "闊佬"一名, 唔止有好大分別, 仲有存在風險添,

有錢佬但係唔闊佬唔關你事, 有錢佬又闊佬先可以成美事

▼ 官也街街口, 榴槤雪糕, 香濃軟滑, 食得出好足料, 木康布丁都滑, 但係cream味弱左啲, 可能cream既比例落少左

▼ 行入呢條官也街, 一定要買既兩家手信 : 晃記肉切酥, $9一包, 薄薄地一片片, 好香南乳味, 新鮮香脆; 仲有正牌車厘哥夫鳥結糖, 有幾間店舖都係賣鳥結糖, 記住要揀正牌喎, 除左原味, 咖啡味都好味, 佢裡面夾既係杏仁嚟架,

▼ 呢間葡國餐廳早得濟未開始營業

▼ 於是去左呢間, 右下係食客, 唔係我嚟, 我食得豪過佢啲啲

▼ 燒乳豬仔+葡式腸炒飯底$128, 呢個馬介休球, 味道似薯仔球多啲

滿足完口腹之慾後, 真係好想好想(x 10)搭車去路環, 去參觀吓教堂, 呢樣係我呢世人最大既嗜好, 其次就係參觀皇宮, 仲想去睇吓橫琴海對岸, 工程已經展開, 第二時又會變成另一番景象架嘞, 但係有人話路環太遠,冇嘢行, 剩係食個葡撻, 唔值, 所以又响番氹仔前行嘞

▼ + ▲ Start from zero 都响澳門留低踪跡 ?

▼ 同香港呢個比較吓......

2010年5月13日

呢大半世人撞過兩次, 第一次撞嘢嗰時未夠18歲, 唔知係咪一個人太疲累意識太弱就好易會見到
話說中五畢業就入左SC銀行, 經過一連串上堂培訓, 出分行實習之後, 終於被派到(多數會原區安置)官塘一個山頭做柜台員(TELLER), 我打工生涯最忙最多嘢做就係呢兩年架嘞, 要服務成村人喎, 一放工即刻碌落山, 換左套制服, 拎番啲預科課本返夜校, 當時屋企要我出嚟搵錢, 唔容許我繼續讀日校, 自己好天真咁(唔傻架)以為讀夜校中六都掂, 所以拎住做暑期工賺嗰五百蚊就去報讀位於新蒲崗寶光工廠大廈(要提下佢, 第二份銀行工同佢有啲淵緣架)隔離嗰間文理英文書院, 係7點倒上堂
6點半, 當時開始入冬, 天都黑齊, 月華街有條二百幾級樓梯可以落到官塘道, 我行小半啫, 然後過斑馬線到官塘工業大廈門口搭巴士, 嗰時官塘工業大廈仲係興建緊, 一個大地盤, 圍住哂, 黑嘛嘛, 影都冇隻, 我驚有壞人多啲囉, 嚟架15號, 啱, 於是猛咁挮手, 一心諗住上左車就安全嘞, 前門上車入錢, 因為拎住啲厚重既課本, 為左易啲落車, 我揀左樓下最近中門後面嗰個位嚟坐, 坐定左好自然向前望, 前門同中門之間咪有兩排打橫既座位, 相對而坐既, 當時個車箱好暗, 暗到幾乎睇唔見, 我隱若見到每邊都坐住左3至4個垂低頭冇表情既男人, 如是者一個站又一個站咁過, 嗰幾個男人一樣係坐定定垂低頭冇表情, 架巴士一路都冇停過站, 直至到左新蒲崗, 我禁鐘, 司機停車畀我落車
落左車, 一路行番學校, 一路諗, 嗰時先知驚, 剛才同我同車既係一個個實實在在既靈體, 而我上左一架原本只係載佢地既車, 個司機順便載左我一程
可能個司機見一個黑影身軀响咁黑嘛嘛既地方等車, 誤會左我都係, 如果唔係, 我點會見到佢架車, 又猛咁挮手呢, 醒番起我上車入錢嗰陣司機都冇轉過頭嚟望下架
仲有, 成程車冇停過站落客, 官塘, 牛頭角, 九龍灣, 彩紅村…….經過咁多地方, 平時一定會有人落車, 更奇怪既係, 點解沿途冇人挮手要上巴士? 因為啲人根本唔會睇到有呢一架巴士經過
我又諗, 若果到左新蒲崗, 個司機唔停車畀我落車的話, 咁我又會被載到去邊度呢

遇鬼記------之二

開始返左人生第三份工都差不多一年嘞, 覺得呢份工可以有排做, 應該會係你唔炒佢佢一定唔會炒你咁(世事無絕對, 容後再談), 於是買左一間位於香港島一梯兩伙, 窄窄長長既屋, 間屋裝好修但係未正式入去住, 有日我地放左工响中環買掛牆鐘, 買夜左諗住返新居瞓一晚, 行到街口, 見到泊晒好多報紙採訪車, 入到大廈大堂, 見有警察, 記者响度, 看更話我地聽晏晝有人跳樓, 唉, 都上樓啦, 唔通又搭一輪車返舊居咩
一入到屋, 已經聽到幾嘈吓, 係由屋尾廚房嗰邊傳嚟, 於是入廚房斜望上去, 嗰個單位著左燈, 聽到把女人聲, 邊喊邊鬧 : “你個畜生, 累死我個女…” 事發單位就正係我隔離既上一層
第二日睇番報紙, 有個女仔响廚房後街嗰邊跳樓, 女仔係响髮型屋做化妝既, 佢做IT 既男友另結新歡
過左幾日, 襯放假我買左啲家庭用品呀濕星嘢呀咁, 準備放低响新居, 中午時份, 冇人出入, 入lift之後, 禁左我個層, 個腦仲一路諗緊有啲咩未買齊, 個lift上到咁上吓, 一開lift門我就好自然行出去轉右準備開門入屋嘞, 哝, 乜我個門口唔同晒既, 一擰轉頭就見到對面單位門口燒住一支長蠟燭, 又放左啲生果呀嗰啲, 我知驚嘞, 我响事發嗰一層呀! 頭先佢响個lift度, 我剛才同佢同lift 呀! 嘩, 驚到腳都軟, 我諗緊拉開道防煙門, 行樓梯沖落一層, 但係再諗, 去唔到我屋企架, 交义樓梯, 單去番單, 雙去番雙, 呢個咁狹小既空間, 前無去路, 佢响度呀, 响我身跟! 再望吓, 居然部lift仲開住道門, 唔理喇, 即刻沖番入lift , 個lift 自動關門落番一層我屋企, 諗番轉頭, 冇理由格, 剛才我响上面嗰層, 又出lift 行到人地門口, 又轉回頭諗住行樓梯, 又返番轉頭去搭lift, 都繞攘左幾分鐘啦, 個lift 喺一兩分鐘冇人出入就會自動關門落番地下架嘞, 係佢一路响度幫我禁住度lift門, 等我入番去呀! 其實佢應該係冇心嚇我嘅, 係佢要番屋企啫, 之後, 我响嗰度住左十年多, 個lift從未試過停錯層呀
發生事之後, 我都成日見負心男同亞新歡一齊返去嗰個單位, 好似若無其事咁, 仲有, 亞新歡居然响我公司樓上啲公司仔返工, 負心男有時仲响公司樓下接亞新歡放工添, 過左一排, 我就冇見佢地出現嘞, 而事發單位十年後以低過市價少少既價錢賣出咗