下星期推售嘅 i bond, 引起全民討論, ‘買唔買得過?’
睇專家分析啦, 我唔係專家, 我係(扮)專家啫
仲買iBond？ 大明燈 - 孫柏文
(2011年07月06日)
http://www.am730.com.hk/article.php?article=63368
早排政府啲措施，真係好勁。例如，出個劏頸級嘅物業印花稅，就搞到樓市即時變成一潭死水。而更加勁嘅係，財爺宣布嘅iBond(通脹掛鈎債券)只聞樓梯響，一直未見下文，通脹卻日日升，市民莫奈何，但在特區老百姓指定遊行日，冇人出來示威，大叫政府慢幾拍，始終無具體計劃公布，一味叫人乾等，望住啲港元一路縮水。
起碼七一夜晚，啲搞到告士打道金鐘塞車塞到銅鑼灣嘅大佬們唔係大嗌：「抗通脹！」當然，我哋omniscient(無所不知)、omnipotent(無所不能)嘅政府懂得睇時機外，亦可能係因為美元由3月後橫行。唔信，上網㩒張一年美匯指數圖，再定條10日平均線，跟住睇吓條平均線點走。係咪喺3月見頂呢？美元橫行，代表我哋同佢掛鈎嘅港元無繼續貶值。
孫柏文一直講到口水都冇(I know it’s hard to believe, but it’s possible)，就是特區通脹的主因，係弱美元呢個「電源」，經聯繫匯率嘅「電線」，電到啲冇保護自己嘅特區人。
點都好，好似第一次世界大戰嘅施里芬計劃咁，政府話咗會做嘅，就算世界已180度轉咗，都要繼續執行！遲早又要葉劉淑儀議員喺周日論壇同啲青年話：「現任政府仲差過我做局長時。起碼，當時董特首有嗰種對經濟政策嘅機動性，可以喺無議就決、無決就行嘅情況下宣布『八萬五政策已經唔存在喇』。依家？喺全球貨幣供應通縮嘅情況下，都要推iBonds，將100億元抽出經濟體。」
好，去到呢度，你都係覺得iBond有好過冇，咁我就要同你講，成個iBond計劃最危險喺邊度。我問你，iBond嘅回報係建基喺啲咩上邊架？如果你答：「通脹囉。」咁就錯晒，因為係建立喺「政府統計處甲類物價指數」。
有咩分別？前者係上億件貨品、服務交易或標價時，因貨幣供應太快，出現貨品普遍貴咗。後者可能係一個篤出來嘅數。我問你，究竟係邊個計？更重要係，邊個可以決定點計？如果豬肉貴咗、電腦平咗，那麼回報又會有怎樣的影響呢？
聽埋以下千禧年代開頭呢段15分鐘 phone in 節目,
第一位打入嚟嘅女聽眾, 又係問‘買唔買得過?’
呢位周主持(齊撐政府協奏曲樂手
) 謬論連篇
請也留意佢拍檔嗰兩三句精句(16-17min.)!
< iBond下周開始按受認購 >
一個負面, 加一個正面, 買定唔買, 自己決定啦!
冷眼旁觀十數載, 得出結論, 香港政府推出甚麼, 最終目的都係為咗要令到兩幫人仕受惠, 地產商同資金佬!
例子一 : 成日話樓價太貴香港人買唔到樓, 所以香港政府要推多啲地出嚟, 起限呎限價樓宇, 地產商連聲附和, 諗諗, 邊個去起? 咪又係益晒班地產商囉, 佢哋會就住嚟起架喇, 又多好多地盤賺大錢嘞
例子二 : 最令全民反感, 收尾被推翻, 仲搞到無啦啦多咗六千蚊現金洗嘅荒天下之大謬嘅提議‘注資入強積金戶口’, 將強積金交畀私營牟利機構管理, 跟本就係一個大錯誤, 佢個‘強’字改得最貼切, 強搶呀!
我最憎係有人借你過橋, 仲要大大聲公告天下, 扮到懶係為咗你著想咁.. .. .. .. .. 純粹有感而發, 可能同以上‘買? 唔買?’無關
~ 點番隻勵志歌曲畀响夕陽政府管治下搵生活嘅我哋收聽 ~
人生滿希望 (1978)
徐小鳳 / 作曲：中島美雪 / 作詞：鄭國江
看夕陽 意茫茫 人生滿風浪
前途在那方 滿海飄蕩 找不到岸
這夕陽 如盼望 明天再一樣
前途在遠方 要登彼岸 不必太彷徨
要努力 求上進 就算得失毋須較量
豪情萬丈 求向上 莫再回頭望
看夕陽 滿盼望 人生滿希望
前途在遠方 縱使失望 悲哀化力量
看夕陽 意茫茫 情海滿風浪
情人在那方 我天天在 癡心盼望
愛共情 何處是 如今太失望
情人在遠方 愛的希望 只恐太渺茫
愁與恨 毋再復記 舊愛深深留心上
柔情萬丈 情至上 願以情為岸
看夕陽 滿盼望 何必太失望
毋用淚滿腔 信心堅強 悲哀化力量
愁與恨 毋再復記 舊愛深深留心上
柔情萬丈 情至上 願以情為岸
看夕陽 滿盼望 何必太失望
毋用淚滿腔 信心堅強 悲哀化力量
< < 2011/7/10 追加新聞兩則 > >
一 : 政情：傻強廢噏iBond
http://the-sun.on.cc/cnt/news/20110710/00408_001.html
預算案宣布推出與通脹掛鈎債券（iBond）嘅消息後，事隔約四個月，財經事務及庫務局局長陳家強至公布詳情，尋日佢出席個電台節目推介呢個計劃，即係做推銷員啦，但傻強嘅表現卻係驚死上身，問到政府對未來通脹有乜預測？佢一手推咗畀政府經濟顧問；至於市民買唔買好？佢嘅答案更加兩面三刀。睇嚟，傻強入官場幾年耍太極已經學得好到家！
推波畀政府經濟顧問
iBond對香港人嚟講係新事物，傻強早前舉行記者會公布咗計劃大綱後，好多市民仲係矇查查，尋日佢出席電台節目都被問到iBond，既然個名係同通脹掛鈎嘅債券，大家嘅焦點梗係到底呢種債券可唔可以抗到通脹啦，不過聽完傻強解畫，你想知道呢個答案都好難。
佢話，iBond係畀市民一個將利息同通脹掛鈎嘅投資選擇，市民對未來通脹走向有自己嘅睇法，如果覺得未來通脹高嘅，咁iBond某種程度可以幫助抵銷通脹；但如果覺得唔會高，iBond就未必係你嘅投資選擇。咁未來通脹走勢又點呢？傻強仍然一招推得就推，話政府經濟顧問已經作咗預測，點知跟住又收口。佢講咗咁多，市民攞到幾多訊息？可以話係零，不過就可以睇到佢喺官場浸淫幾載後，太極功力愈嚟愈深厚。
講到呢種債券，投資界都有唔少意見，仲有人覺得難免出現僧多粥少嘅情況，或者係咁，傻強今次做推銷員都放軟手腳啩。其實，香港要發展做金融中心，唔少人都認為應該豐富金融產品，政府發債可算係其中一種刺激，傻強使唔使咁保守呢？
二 : 自願醫保多缺陷遭潑冷水
http://the-sun.on.cc/cnt/news/20110710/00407_053.html
港府日內公布「自願醫保」諮詢結果以推動「缺陷的醫療保險」制度。病人組織預料年輕人不會踴躍投保，低收入的長期病患者及退休人士又無錢投保，最終仍是依賴公營醫療服務，自願醫保變成無助減少每年高達四百億的公共醫療開支。香港醫學會會長蔡堅也對自願醫保「大潑冷水」，指醫生很難「極速」確診回答病人的保險賠額，醫學界對計劃極有保留。
或抽500億為老弱包底
港府推出自願醫保以鼓勵年輕人參與為主。社區組織協會幹事彭鴻昌認為，就業年輕人都早已跟隨現職公司購買醫療保險，甚少額外購保，況且也難鼓勵年輕又健康者投保，故預料參與保險的多是中產退休人士，絕不會是低收入的長期病患者及長者，但這批人士的保費最昂貴、最難投保且最需要受醫療保障：「都無錢買點買保險！所以整體都唔會解決到佢哋依賴公營醫療系統！」
消息又指，當局會為老弱傷殘另購高風險保險，從自願醫保總額中抽取百分之二投保到高風險保險補底，若仍不足夠則抽取五百億醫保基金「包底」。不過，保險公司會否承擔高風險的投保仍是未知之數。病人互助組織聯盟副主席張德喜則持樂觀態度：「如果港府肯做，我諗私營市場都會有興趣，個pool（群組）都唔細。」
另外，據知港府會在計劃內制訂診斷症候族群，讓市民參考醫療套餐及賠償金額。醫學會會長蔡堅擔心，九成醫生難在短時間斷定病人患甚麼病及嚴重性，未能告知病人醫療費用實數。他舉例指，若病人腹痛求診，可能是生膽石，也可能患肝癌，兩者醫療費用相差極大，醫生要經多種化驗才能確診，所以他預料醫保規限性過多，形成醫療界對自願醫保有保留。
(凡任何決策, 只需朝著這個方向諗, '最終目的都係為咗要令到兩幫人仕受惠, 地產商同資金佬' 哦, 明晒!)
